والدة الشهيد عمر القاضي تهدي الرئيس السيسي سلسلة ابنها الراحل

أهدت والدة الشهيد عمر القاضي سلسلة تحمل اسم نجلها إلى الرئيس عبد الفتاح السيسي، معربة عن سعادتها بتكريمه الدائم لها ولأسرتها.

وقالت والدة الشهيد عمر القاضي: “اتشرفت النهاردة بوجودي مع حضرتك وبالتكريم اللي دايمًا بتكرمهولنا، وعندي هدية غالية عليا عاوزة أهديها لسيادتك، وهي سلسلة عمر وعليها اسمه، عشان حضرتك غالي عليا، بهديك حاجة غالية عليا، وبقول لحضرتك جبت حق عمر وكل شهيد في مصر، متشكرة ليك جدًا، وكمل وإحنا في ضهرك، وربنا يخليك لينا ويقضي على الشر وأهله”.

وفي سياق متصل، وجه الرئيس عبدالفتاح السيسى الشكر إلى والدة الشهيد عمر القاضي،بعدما أهدته سلسلة بصورة نجليها الشهيد، حيث استشهد القاضي وهو يدافع عن تراب الوطن في 2019، تاركًا خلفه نموذجًا مشرفًا من التضحية والشجاعة.

وأضاف الرئيس عبدالفتاح السيسي، خلال كلمته، اليوم الأربعاء، بمناسبة الاحتفال بعيد الشرطة الـ73، قائلًا: «باسمي وباسم كل المصريين بوجه الشكر ليكي مرة، وبوجه الشكر مرة تانية ليكي علشان أنت أدتيني حاجة حلوة من ريحة عمر هحتفظ بيها، وربنا يجعل عمر ذخر ليكم».

وتابع: «كل نقطة دم وكل روح وكل إنسان قدم نفسه هو اللي حافظ على الوطن، مش أنا اللي حافظت، إحنا مش هننسى كل بيت قدم شهيد أو مصاب مش هننساه وكل الدعم ليه، وقبل كل دا مصر مش هتنساه، مصر عايشة بسببهم».

وأكمل: «دا عرفان كل يوم نقدمه لكل أسرة شهيد، التمن اللي أحنا بنقدمه علشان نحافظ على الأمن والأمان، الشر مش بينتهي وطول ما الدنيا موجودة في شر، وعلشان نتخلص من الشر دا هيكون في تضحيات، التمن دا علشان نحافظ على 100 مليون مواطن، لا دا 106 مليون مواطن وفي 9 ملايين ضيف كمان».

وأكمل: «الضنا غالي أوي وشوفوا الأمهات، عايز أقولكم حافظوا على وطنكم».