الرئيس السيسي خلال احتفال عيد الشرطة: «محدش هيقدر يقرب من البلد دي»
أكد الرئيس عبد الفتاح السيسي أن مصر قادرة على التصدي لكل من يحاول الاعتداء على أمن البلاد وسلامة مواطنيها، في ظل مرحلة حرجة تمر بها المنطقة.
وقال الرئيس السيسي، خلال كلمته باحتفالية عيد الشرطة، «ربنا مطلع علينا.. إحنا لا نعتدي ولا نتآمر على أحد، إحنا بنعمر داخل بلادنا وحدودنا، يمكن فيه ناس الغل والحقد صعب في قلوبها مش قادرين يستحملوا شوفوا حاجة جميلة عايزين يهدوا ويدمروا كل حاجة وبيعتقدوا إن كده ممكن تتبني».
وأردف قائلًا: «أقول للمصريين محدش بفضل الله هيقدر يمسكم، جيشنا وشرطتنا مش بتوع حد تاني وعمرهم ما هيكونوا غير جيش وشرطة مصر».
وأكد السيسي أن كلًا في موقعه يحمي ويحافظ على البلاد، مضيفًا: «وعينا وفهمنا للأحداث التي نمر بها ضروري، والتحديات والعدائيات لن تنتهي وهذه طبيعة الدنيا.. مفيش حاجة اسمها ناس مسالمة فيه مصالح ومؤامرات.. الدنيا اختبارات وابتلاءات لصحابها».
وتابع قائلًا: «المشاكل والمصاعب لا تنتهي.. وعشان كده الناس بتشتغل وتطور من نفسها عشان تحل من مشاكلها».
ومضى قائلًا: «أنا بقول كده عشان الشائعات أحيانا بتزيد ولما تشوفوا ده تعرفوا إن الاستهداف زائد.. بفضل الله سبحانه وتعالى وقوة محدش هيقدر يقرب من البلد دي».
وشدد قائلًا: «اطمئنوا بفضل الله سبحانه وتعالى لأن ربنا موجود ومطلع على تصرفاتنا كلنا.. متقلقوش ومتخافوش بفضل الله محدش يقدر يقرب من بلدنا».
